Es is immer bloß a Bamm
Es is immer bloß a Bamm, den wussi wechmachn, a Heggn,
Immer bloß a Brunna, a Gärdla, a Pflasder, a Maierla, a Briggla,
Es is immer bloß a alds Haisla, des wussi eireißn denna, a Baggoofn,
A Milchrambm, a Woochhaisla, a Staagreiz, a Scheierla, a Keller,
Es is immer bloß a Booch, wu begroodichd werd, bloß a Fuhr,
A Weech, der wu verleechd wird, a Hohlgaß, a Hubbl, a Ranga,
Es is immer bloß a Agger, wu wechkummd, a Wiesn, a Wäldla,
Es is immer bloß a Bauer, wu aufgeem dudd, a Hof, wu eigehd,
A alder Grauderer, wu wider wech is, a Werdschafd na wenger,
A Loodn wider fodd, a guuda Haud, a komischa Kabbm,
Aaner allaa auf weider Fluur, a ganz einger Schlooch.
Immer sinns bloß a boor Veecherle un Viecher, wu fodd sinn,
A boor Pfiffer un Graider un Blumma, wummer nämmer sichd,
Immer bloß a Stiggla, a Drimmla is widder fodd, nedd di Weld,
Doo is nedd schood drum, soongs, nedd wieder draagisch,
Des hadd wechkerd, des ald Zeich, schood um a jeds Word,
Pfeif auf die boor Greedn doo, soongs, bloß a boor Zergwedschda,
Des Glumb is kann Schuß Bulfer weerd, a Schlooch ins kald Wasser.
Immer bloß a bißla, a wenig wos, nix weider,
Immer hald bloß a Bamm, a Haisla, a Baierla wenger,
Bloß midder Zeid hald werd alles ganz annersch
Un dernooch hadd widder kanner doo dervoo wos gwißd,
Hadds widder kanner so kumma sehng, wies sei werd,
Haddmer widder rein goor nix machen kenna dergeeng.
Bloß am End stenners na dodd mid gwaschna Häls und beeglda Hoosn
Un mid aufgrissna Aang stierns widdi Eelgetzn in die Weldgschichd,
Gratzn middi Finger am Lagg un am Gloos un am Blech un am Deer
Un suhng nooch an bißla, bloß an Fitzerla vonnam ganz annern Leem.
Helmut Haberkamm
Mehr Informationen zum Autor finden Sie auf dessen Internetseite www.helmuthaberkamm.de.